ಬೆಂಗಳೂರು: ರಾಜ್ಯದ ಗ್ರಾಮ ಪಂಚಾಯಿತಿಗಳು ಮತ್ತು ಸರ್ಕಾರಿ ಸಂಸ್ಥೆಗಳ ಕಚೇರಿ ನಿರ್ವಹಣೆಯನ್ನು ಪರಿಸರ ಸ್ನೇಹಿಯಾಗಿಸಲು ಹಾಗೂ ಸ್ಥಳೀಯ ಉದ್ದಿಮೆಗೆ ಉತ್ತೇಜನ ನೀಡಲು ಕರ್ನಾಟಕ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಂಡಿದೆ. ಇನ್ಮುಂದೆ ಪಂಚಾಯಿತಿಗಳಿಗೆ ಅಗತ್ಯವಿರುವ ತೆಂಗಿನ ನಾರಿನ ಉತ್ಪನ್ನಗಳು ಮತ್ತು ಪೀಠೋಪಕರಣಗಳನ್ನು ಟೆಂಡರ್ ಇಲ್ಲದೆ ನೇರವಾಗಿ ಖರೀದಿಸಲು ಅವಕಾಶ ಕಲ್ಪಿಸಲಾಗಿದೆ.
ಸರ್ಕಾರದ ಹೊಸ ಮಾರ್ಗಸೂಚಿ: ಹಣಕಾಸು ಇಲಾಖೆಯ ಇತ್ತೀಚಿನ ಅಧಿಸೂಚನೆಯಂತೆ, ಕರ್ನಾಟಕ ರಾಜ್ಯ ತೆಂಗಿನ ನಾರಿನ ಅಭಿವೃದ್ಧಿ ನಿಗಮದಿಂದ (KSCDC) ಗರಿಷ್ಠ 50 ಲಕ್ಷ ರೂಪಾಯಿಗಳ ಮಿತಿಯಲ್ಲಿ ನೇರ ಖರೀದಿ ಮಾಡಬಹುದು. ಕರ್ನಾಟಕ ಸಾರ್ವಜನಿಕ ಸಂಗ್ರಹಣೆಗಳಲ್ಲಿ ಪಾರದರ್ಶಕತೆ ಕಾಯ್ದೆ (KTPP) ಇಂದ ಈ ಖರೀದಿಗೆ ವಿಶೇಷ ವಿನಾಯಿತಿ ನೀಡಲಾಗಿದೆ.
ಪಂಚಾಯಿತಿಗಳಲ್ಲಿ ಏನೆಲ್ಲಾ ಖರೀದಿಸಬಹುದು?
ಈ ಹೊಸ ಆದೇಶದಡಿ ಗ್ರಾಮ ಪಂಚಾಯಿತಿಗಳು ಕೇವಲ ಚಾಪೆಗಳನ್ನಷ್ಟೇ ಅಲ್ಲದೆ, ವೈವಿಧ್ಯಮಯ ಆಧುನಿಕ ಸಾಮಗ್ರಿಗಳನ್ನು ಪಡೆಯಬಹುದು:
ಪೀಠೋಪಕರಣಗಳು: ಕಚೇರಿ ಬಳಕೆಗೆ ಬೇಕಾದ ನಾರು ಆಧಾರಿತ ಸೋಫಾ ಸೆಟ್ಗಳು, ಆರಾಮದಾಯಕ ಕುಶನ್ ಆಸನಗಳು ಮತ್ತು ಆಫೀಸ್ ಪಾರ್ಟಿಷನ್ ಬೋರ್ಡ್ಗಳು.
ನೈರ್ಮಲ್ಯ ಪರಿಕರಗಳು: ಗ್ರಾಮ ಸ್ವಚ್ಛತೆಗಾಗಿ ಗಟ್ಟಿಮುಟ್ಟಾದ ನಾರಿನ ಬ್ರಷ್ಗಳು ಮತ್ತು ಪೂರಕ ಸಾಮಗ್ರಿಗಳು.
ಪರಿಸರ ಸ್ನೇಹಿ ಉತ್ಪನ್ನಗಳು: ಉದ್ಯಾನವನಗಳಿಗೆ ನಾರಿನ ಹೂಕುಂಡಗಳು, ಗೊಬ್ಬರ ಹಾಗೂ ಕೆರೆ-ರಸ್ತೆಗಳ ಮಣ್ಣು ಸವೆತ ತಡೆಯುವ ಜಿಯೋ-ಟೆಕ್ಸ್ಟೈಲ್ಸ್.
ಸಾರ್ವಜನಿಕ ಸೇವೆಗೆ: ಅಂಗನವಾಡಿ ಮತ್ತು ಸರ್ಕಾರಿ ವಸತಿ ಶಾಲೆಗಳಿಗೆ ಬೇಕಾದ ಗುಣಮಟ್ಟದ ನಾರಿನ ಹಾಸಿಗೆಗಳು (Mattresses).
ಈ ನಿರ್ಧಾರದ ಹಿಂದಿನ ಉದ್ದೇಶ:
ಸಾಮಾನ್ಯವಾಗಿ ಸರ್ಕಾರಿ ಖರೀದಿ ಎಂದರೆ ಟೆಂಡರ್ ಪ್ರಕ್ರಿಯೆಯ ವಿಳಂಬ ಇರುತ್ತಿತ್ತು. ಆದರೆ ಈ ಆದೇಶದಿಂದಾಗಿ:
ವೇಗದ ಖರೀದಿ: ಪಂಚಾಯಿತಿಗಳು ಸಮಯ ವ್ಯರ್ಥ ಮಾಡದೆ ತಕ್ಷಣಕ್ಕೆ ಬೇಕಾದ ವಸ್ತುಗಳನ್ನು ಪಡೆಯಬಹುದು.
ರೈತರಿಗೆ ನೆರವು: ತೆಂಗು ಬೆಳೆಗಾರರು ಮತ್ತು ನಾರು ಉತ್ಪಾದನಾ ಘಟಕಗಳಿಗೆ ಹೆಚ್ಚಿನ ಬೇಡಿಕೆ ಸೃಷ್ಟಿಯಾಗಲಿದೆ.
ಗುಣಮಟ್ಟದ ಭರವಸೆ: ಸರ್ಕಾರಿ ಸ್ವಾಮ್ಯದ ನಿಗಮವೇ ಉತ್ಪಾದಿಸುವುದರಿಂದ ಕಳಪೆ ಗುಣಮಟ್ಟದ ಭೀತಿ ಇರುವುದಿಲ್ಲ.
ಷರತ್ತುಗಳು: ಈ ಉತ್ಪನ್ನಗಳನ್ನು ನಿಗಮದ ಸ್ವಂತ ಉತ್ಪಾದನಾ ಕೇಂದ್ರಗಳಲ್ಲಿ ತಯಾರಿಸಿರಬೇಕು ಮತ್ತು ಮಾರುಕಟ್ಟೆ ದರಕ್ಕೆ ಅನುಗುಣವಾಗಿ ಸಮಂಜಸವಾದ ಬೆಲೆಗೆ ಖರೀದಿಸಬೇಕೆಂದು ಸರ್ಕಾರ ಸೂಚಿಸಿದೆ.
ಖರದಿ ಕೇಂದ್ರಗಳ ಹೆಚ್ಚಿನ ಮಾಹಿತಿಗಾಗಿ ಸಂಘದ ಪದಾಧಿಕಾರಿಗಳನ್ನು ಸಂಪರ್ಕಿಸಿ.
No comments:
Post a Comment