📋 ವಿಭಾಗ 1: ತೆರಿಗೆ ವ್ಯಾಪ್ತಿ ಮತ್ತು ಆಸ್ತಿ ನೋಂದಣಿ
ಪ್ರ 1. ಸರ್ಕಾರಿ ಭೂಮಿ, ಅರಣ್ಯ ಭೂಮಿ ಅಥವಾ ಸರ್ಕಾರದ ನಿಯಂತ್ರಣದಲ್ಲಿರುವ ಆಸ್ತಿಗಳ ಮೇಲೆ ತೆರಿಗೆ ವ್ಯಾಪ್ತಿ ಇದೆಯೇ?
ಉತ್ತರ: ಇಲ್ಲ. ಪ್ರಕರಣ 199ರ ಪ್ರಕಾರ ಇಂತಹ ಆಸ್ತಿಗಳನ್ನು ತೆರಿಗೆ ವ್ಯಾಪ್ತಿಯಿಂದ ಕೈಬಿಡಬಹುದು. ಸೂಕ್ತ ಮಾರ್ಗಸೂಚಿಗಳ ಮೂಲಕ ಕ್ರಮ ವಹಿಸಬೇಕು.
ಪ್ರ 2. RTC ಕಾಲಂ 9ರಲ್ಲಿ ಮೀಸಲಿರಿಸಿದ ಜಮೀನಿನಲ್ಲಿ ಹಕ್ಕು ಪತ್ರಗಳಿಲ್ಲದ ಸ್ವತ್ತುಗಳಿಗೆ ನಮೂನೆ ವಿತರಿಸಬಹುದೇ?
ಉತ್ತರ: ಹೌದು. ಗ್ರಾಮ ಠಾಣಾ ಪ್ರದೇಶಗಳಲ್ಲಿರುವ ಸ್ವತ್ತುಗಳಿಗೆ ಸಂಬಂಧಿಸಿದಂತೆ, ಪ್ರಕರಣ 209 ಮತ್ತು 215ರ ಪ್ರಕಾರ ತಾಲ್ಲೂಕು ಪಂಚಾಯತಿ ಅಥವಾ ಜಿಲ್ಲಾ ಪಂಚಾಯತಿ ಸಮಿತಿಗಳ ಮೂಲಕ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿ ಕ್ರಮ ವಹಿಸಬಹುದು.
ಗಮನಿಸಿ: ಕಡ್ಡಾಯವಾಗಿ ಗ್ರಾಮ ಪಂಚಾಯತಿ ಬೇಡಿಕೆ ಪತ್ರ, ದೃಢೀಕೃತ ಸ್ಥಳ ಮಹಜರ್ ವರದಿ ಮತ್ತು ದಿನಾಂಕ 14.06.2013ರ ಹಿಂದಿನ ವಿದ್ಯುತ್ ಬಿಲ್ ಅಥವಾ ಬ್ಯಾಂಕ್ ಅಕೌಂಟ್ ಸ್ಟೇಟ್ಮೆಂಟ್ ಲಗತ್ತಿಸಬೇಕು.
ಪ್ರ 3. ಹಕ್ಕು ಪತ್ರ ವಿತರಣೆ ಮಾಡಿದ ಸ್ವತ್ತಿನ ಜಮೀನಿಗೆ ಸಂಬಂಧಿಸಿದ ರಿಜಿಸ್ಟರ್, ಪಟ್ಟಿ ಮತ್ತು ಮಂಜೂರಾತಿ ದಾಖಲೆಗಳನ್ನು ಯಾವ ನಮೂನೆಯಲ್ಲಿ ವಿತರಿಸಬಹುದು?
ಉತ್ತರ: ಹಕ್ಕು ಪತ್ರ ವಿತರಿಸಿದ ಪ್ರಾಧಿಕಾರದಿಂದ ದೃಢೀಕೃತ ಮಾಹಿತಿ ಪಡೆದು, ಕಂದಾಯ ಇಲಾಖೆ ನಿಯಮಾನುಸಾರ ನಿಗದಿತ ನಮೂನೆಯಲ್ಲಿ ವಿತರಿಸಬೇಕು.
ಪ್ರ 4. ನಮೂನೆ-11ಬಿ ಸ್ವತ್ತನ್ನು ವರ್ಗಾವಣೆ (Sale/Gift) ಅವಕಾಶ ಇರುವ ನಮೂನೆ-11ಎ ಆಗಿ ಬದಲಾಯಿಸಲು ಅವಕಾಶ ಇದೆಯೇ?
ಉತ್ತರ: ಹೌದು. ನಮೂನೆ-11ಬಿ ಸ್ವತ್ತನ್ನು ವರ್ಗಾವಣೆ ಅವಕಾಶ ಇರುವ ನಮೂನೆ-11ಎ ಆಗಿ ಬದಲಾಯಿಸಲು ನಿಗದಿಪಡಿಸಿದ ಮಾರ್ಗಸೂಚಿಗಳಂತೆ ಕ್ರಮ ವಹಿಸಬೇಕು.
🏠 ವಿಭಾಗ 2: ತೆರಿಗೆ ಲೆಕ್ಕಾಚಾರ ಮತ್ತು ವಿಧಾನ
ಪ್ರ 5. 94ಸಿ, 94ಸಿಸಿ, 94ಡಿ ಹಾಗೂ 38ಎ ಅಡಿಯಲ್ಲಿ ನೀಡಲಾದ ಹಕ್ಕು ಪತ್ರಗಳ ನಮೂನೆಗಳನ್ನು ತಂತ್ರಾಂಶದಲ್ಲಿ ವಿತರಣೆ ಮಾಡಲು ಅವಕಾಶ ಇದೆಯೇ?
ಉತ್ತರ: ಹೌದು, ಪಂಚತಂತ್ರ/ಇ-ಸ್ವತ್ತು ತಂತ್ರಾಂಶದಲ್ಲಿ ಅವಕಾಶ ಕಲ್ಪಿಸಲಾಗಿದೆ.
ಪ್ರ 6. ನಿಯಮದಲ್ಲಿ ನಿರ್ದಿಷ್ಟಪಡಿಸಿರುವ ಮ್ಯುಟೇಶನ್ ಶುಲ್ಕವನ್ನು ಮುದ್ರಾಂಕ ಶುಲ್ಕದ ಮೇಲೆ ಶೇ. 2ರ ಆಧಾರದ ಮೇಲೆ ಲೆಕ್ಕ ಹಾಕಬೇಕೇ?
ಉತ್ತರ: ಹೌದು, ನೋಂದಾಯಿತ ಪತ್ರದಲ್ಲಿನ ಮುದ್ರಾಂಕ ಶುಲ್ಕ ಪರಿಗಣಿಸಿ ವಿಧಿಸಬೇಕು. ಆದರೆ ವಾರ್ಷಿಕ ಆಸ್ತಿ ತೆರಿಗೆಯನ್ನು ನಿಯಮ 3(4)ರ ಪ್ರಕಾರ ಲೆಕ್ಕಾಚಾರ ಮಾಡಿ ವಸೂಲಾತಿಗೆ ಕ್ರಮ ವಹಿಸಬೇಕು.
ಪ್ರ 7. ನೋಂದಾಯಿತ ಕ್ರಯ ಪತ್ರಗಳಲ್ಲಿನ ಅಳತೆ ಮತ್ತು ವಾಸ್ತವ ಅಳತೆಗೂ ವ್ಯತ್ಯಾಸವಿದ್ದರೆ ಯಾವುದನ್ನು ಪರಿಗಣಿಸಬೇಕು?
ಉತ್ತರ: ನೋಂದಾಯಿತ ಕ್ರಯ ಪತ್ರದಲ್ಲಿರುವ (Registered Deed) ಅಳತೆಯನ್ನೇ ಪರಿಗಣಿಸಬೇಕು.
ಪ್ರ 8. ಸರ್ಕಾರಿ ಶಾಲೆ ಮತ್ತು ಅಂಗನವಾಡಿಗಳನ್ನು ಹೊರತುಪಡಿಸಿ ಉಳಿದ ಸರ್ಕಾರಿ ಕಟ್ಟಡಗಳಿಗೆ ತೆರಿಗೆ ವಿಧಿಸಬಹುದೇ?
ಉತ್ತರ: ಹೌದು. ನಿಯಮ 10(ಅ) ಪ್ರಕಾರ:
ಪ್ರಾಥಮಿಕ ಶಾಲೆ, ಅಂಗನವಾಡಿಗಳನ್ನು ಹೊರತುಪಡಿಸಿ ಉಳಿದ ಸರ್ಕಾರಿ ಕಟ್ಟಡಗಳಿಗೆ ಒಟ್ಟು ಆಸ್ತಿ ಮೌಲ್ಯದ ಶೇಕಡ 25ರಷ್ಟನ್ನು ಸೇವಾ ಶುಲ್ಕವನ್ನಾಗಿ ವಿಧಿಸಬಹುದು.
ಸರ್ಕಾರದ ಇಲಾಖೆಗಳಿಂದ ಬಾಡಿಗೆ/ಗುತ್ತಿಗೆ ಆಧಾರದ ಮೇಲೆ ನೀಡಿರುವ ಜಮೀನು ಅಥವಾ ಕಟ್ಟಡಗಳಿಗೆ ವಾಣಿಜ್ಯ ಉದ್ದೇಶದ ತೆರಿಗೆ ವಿಧಿಸಬಹುದು.
ಪ್ರ 9. ಗ್ರಾಮ ಪಂಚಾಯತಿಗೆ ಸ್ವತ್ತಿನ ತೆರಿಗೆಯನ್ನು ಎಷ್ಟು ಕಂತುಗಳಲ್ಲಿ ಪಾವತಿಸಲು ಅವಕಾಶವಿದೆ?
ಉತ್ತರ: ಪ್ರಸ್ತುತ ಸಾಲಿನ ಬೇಡಿಕೆಗೆ ಅನುಗುಣವಾಗಿ ಪೂರ್ಣವಾಗಿ ಅಥವಾ ಗರಿಷ್ಠ ಎರಡು ಕಂತುಗಳಲ್ಲಿ ತೆರಿಗೆ ಪಾವತಿಸಬಹುದು.
🏗️ ವಿಭಾಗ 3: ಕಟ್ಟಡ ನಿರ್ಮಾಣ ಮತ್ತು ಅನುಮತಿ
ಪ್ರ 10. ಸ್ಥಳೀಯ ಯೋಜನಾ ಪ್ರದೇಶದ ಹೊರಭಾಗದಲ್ಲಿ DTCP ತಾಂತ್ರಿಕ ಅನುಮೋದನೆ ಇಲ್ಲದ ವಿನ್ಯಾಸಗಳನ್ನು (Layouts) ತಿರಸ್ಕರಿಸಬಹುದೇ?
ಉತ್ತರ: ನಿಯಮದಲ್ಲಿ ನೇರ ಅವಕಾಶ ಇರುವುದಿಲ್ಲ. ಆದರೆ ತಾಂತ್ರಿಕ ಅನುಮೋದನೆಗೆ ಸಂಬಂಧಿಸಿದ ಯಾವುದೇ ಆಕ್ಷೇಪಣೆ ಇದ್ದಲ್ಲಿ ಸಂಬಂಧಿಸಿದ ಪ್ರಾಧಿಕಾರಕ್ಕೆ ಪತ್ರ ಬರೆಯಬಹುದು.
ಪ್ರ 11. ಭೂ ಪರಿವರ್ತಿತ/ಅಪರಿವರ್ತಿತ ಕಂದಾಯ ಭೂಮಿಯಲ್ಲಿ ಬಡಾವಣೆ ಅನುಮೋದನೆ ಇಲ್ಲದ ಸ್ವತ್ತುಗಳಿಗೆ ನಮೂನೆ ವಿತರಿಸಬಹುದೇ?
ಉತ್ತರ: ನಿಯಮ-8ರ ಪ್ರಕಾರ ಅಂತಹ ಜಮೀನಿನಲ್ಲಿ ನಾಗರಿಕ ಉದ್ದೇಶದ ನಿವೇಶನ, ಉದ್ಯಾನ ಮತ್ತು ರಸ್ತೆಗಳನ್ನು ಪರಿತ್ಯಜನಾ ಪತ್ರದ ಮೂಲಕ ಪಂಚಾಯತಿಗೆ ವರ್ಗಾಯಿಸಿಕೊಂಡು, ಉಳಿಕೆ ವಿಸ್ತೀರ್ಣಕ್ಕೆ ಅನುಗುಣವಾಗಿ ಏಕ ನಿವೇಶನ ಖಾತೆ (Single Site Khata) ತೆರೆಯಬಹುದು.
ಪ್ರ 12. ದಿನಾಂಕ 14.06.2013ರ ಪೂರ್ವದಲ್ಲಿ ಅನುಮತಿ ಪಡೆದ ಭೂ ಪರಿವರ್ತಿತ ಆಸ್ತಿಯ ಮೇಲೆ ಮತ್ತೊಂದು ಕಟ್ಟಡ ನಿರ್ಮಾಣಕ್ಕೆ ಪರವಾನಗಿ ನೀಡಬಹುದೇ?
ಉತ್ತರ: ಕರ್ನಾಟಕ ಗ್ರಾಮ ಸ್ವರಾಜ್ ಮತ್ತು ಪಂಚಾಯತ್ ರಾಜ್ (ಕಟ್ಟಡಗಳ ನಿರ್ಮಾಣ ನಿಯಂತ್ರಣ) ಉಪವಿಧಿಗಳು 2015ರ ಪ್ರಕಾರ ಕ್ರಮ ವಹಿಸಬೇಕು.
ಪ್ರ 13. "Odd site" ಸಂದರ್ಭದಲ್ಲಿ ಇ-ಸ್ವತ್ತು ತಂತ್ರಾಂಶಕ್ಕೆ ಸ್ಕೆಚ್ ಯಾರಿಂದ ಪಡೆಯಬೇಕು?
ಉತ್ತರ: ಅರ್ಜಿದಾರರು ಪರವಾನಗಿ ಹೊಂದಿರುವ ವಾಸ್ತುಶಿಲ್ಪಿ (Architect) ಅಥವಾ ಸಿವಿಲ್ ಇಂಜಿನಿಯರ್ರಿಂದ ಸ್ಕೆಚ್ ಪಡೆಯಬೇಕು.
👨👩👧 ವಿಭಾಗ 4: ಹಕ್ಕು ಪತ್ರ ಮತ್ತು ವಾರಸು
ಪ್ರ 14. ಪಿತ್ರಾರ್ಜಿತ ಸ್ವತ್ತು ಅಥವಾ ಪೌತಿ ವಾರಸು ಖಾತೆ ಪಡೆಯುವ ಪ್ರಕ್ರಿಯೆ ಏನು?
ಉತ್ತರ: ಹಿಂದೂ ಉತ್ತರಾಧಿಕಾರಿ ಕಾಯ್ದೆ 1956ರ ಅಡಿ ಕಂದಾಯ ಇಲಾಖೆಯಿಂದ ವಿತರಿಸಿರುವ ಡಿಜಿಟಲ್ ವಂಶಾವಳಿ ಮತ್ತು ಮರಣ ದೃಢೀಕರಣ ಪತ್ರಗಳನ್ನು ಸಲ್ಲಿಸಿ ಇ-ಸ್ವತ್ತು ಪಡೆಯಬಹುದು. ನಿಯಮ 12ರಂತೆ ಕ್ರಮ ವಹಿಸಬೇಕು.
ಪ್ರ 15. ಖಾಸಗಿ ಜಮೀನಿನಲ್ಲಿ ದಾಖಲೆಗಳಿಲ್ಲದ ಸ್ವತ್ತುಗಳು ಮತ್ತು ಈಗಾಗಲೇ ನಮೂನೆ-11ಬಿ ವಿತರಿಸಿರುವ ಸ್ವತ್ತುಗಳನ್ನು ಮುಂದುವರೆಸಬೇಕೇ?
ಉತ್ತರ: ಕಂದಾಯ ಇಲಾಖೆ ಸುತ್ತೋಲೆ (ದಿನಾಂಕ 08.11.2022) ಪ್ರಕಾರ ಅಂತಹ ಜನವಸತಿಗಳನ್ನು ಕಂದಾಯ ಗ್ರಾಮವಾಗಿ ಪರಿವರ್ತಿಸಿ ಹಕ್ಕು ಪತ್ರ ನೀಡುವ ಕುರಿತು ಕ್ರಮ ವಹಿಸಬೇಕು.
ಪ್ರ 16. ಸರ್ಕಾರಿ ಜಮೀನುಗಳಲ್ಲಿ (ಕಣ/ಗೋಮಾಳ) ಅಧಿಕಾರಿಗಳಿಂದ ಹಕ್ಕು ಪತ್ರ ಪಡೆದವರಿಗೆ ನಮೂನೆ ವಿತರಿಸಬಹುದೇ?
ಉತ್ತರ: ಹೌದು, ದಾಖಲೆಗಳನ್ನು ಪರಿಶೀಲಿಸಿ ಇ-ಸ್ವತ್ತು ನೀಡಬಹುದು. ಆದರೆ ಪಹಣಿಯಲ್ಲಿನ ಉದ್ದೇಶಕ್ಕೆ ವ್ಯತಿರಿಕ್ತವಾಗಿ ಬಳಕೆಯಾಗುತ್ತಿದ್ದರೆ ಕಂದಾಯ ಇಲಾಖೆಯಿಂದ ನಮೂದು ಮಾಡಿಸಲು ಕ್ರಮ ವಹಿಸಬೇಕು.
🏢 ವಿಭಾಗ 5: ನಗರ ಮತ್ತು ಯೋಜನಾ ವ್ಯಾಪ್ತಿ
ಪ್ರ 17. ಯೋಜನಾ ಪ್ರಾಧಿಕಾರಗಳಿಂದ ಅಭಿವೃದ್ಧಿಪಡಿಸಿದ ಬಡಾವಣೆಯ 100% ನಿವೇಶನಗಳನ್ನು ಬಿಡುಗಡೆ ಮಾಡಿದಾಗ ಏನು ಮಾಡಬೇಕು?
ಉತ್ತರ: ಕರ್ನಾಟಕ ನಗರ ಮತ್ತು ಗ್ರಾಮಾಂತರ ಯೋಜನಾ ಅಧಿನಿಯಮ 1961ರ ಪ್ರಕರಣ 17ರ ಪ್ರಕಾರ ಕ್ರಮ ವಹಿಸಬೇಕು. ತಂತ್ರಾಂಶದಲ್ಲಿ 'Bulk entry' ಮಾಡಲು ಅವಕಾಶವಿದೆ.
ಪ್ರ 18. 1992ರ ಪೂರ್ವದಲ್ಲಿ ಕೈಗಾರಿಕಾ ಉದ್ದೇಶಕ್ಕೆ ಪರಿವರ್ತನೆಯಾದ ಸ್ವತ್ತಿಗೆ ಅನುಮೋದಿತ ನಕ್ಷೆ ಇಲ್ಲದಿದ್ದರೆ ನಮೂನೆ ವಿತರಣೆ ಹೇಗೆ?
ಉತ್ತರ: ನಿಯಮಗಳು 2025ರ ನಿಯಮ 8(2)ರ ಪ್ರಕಾರ ಅಗತ್ಯ ದಾಖಲೆಗಳನ್ನು ಪಡೆದು ನಮೂನೆ ವಿತರಿಸಬಹುದು.
ಪ್ರ 19. CRZ-NH ಅಥವಾ ಪುರಾತತ್ವ ಇಲಾಖೆ ವ್ಯಾಪ್ತಿಯಲ್ಲಿ ಈಗಾಗಲೇ ನೀಡಲಾದ PIDಗಳಿಗೆ ಏನು ಕ್ರಮ?
ಉತ್ತರ: ನಿಯಮ 7(1)ರ ಪ್ರಕಾರ ಇವುಗಳಿಗೆ ತೆರಿಗೆ ವಿಧಿಸಲು ಅವಕಾಶವಿಲ್ಲ. ಒಂದು ವೇಳೆ ನಮೂನೆ ವಿತರಿಸಿದ್ದರೆ ಸಕ್ಷಮ ಪ್ರಾಧಿಕಾರದ ಮೂಲಕ ರದ್ದುಪಡಿಸಲು ಕ್ರಮ ವಹಿಸಬೇಕು.
👤 ವಿಭಾಗ 6: ಆಡಳಿತಾತ್ಮಕ ಮತ್ತು ತಂತ್ರಾಂಶ
ಪ್ರ 20. ಕೃಷಿ ಭೂಮಿಯಲ್ಲಿ ಮನೆ ನಿರ್ಮಾಣ ಮಾಡಿಕೊಂಡಿದ್ದರೆ ಮುಂದಿನ ಕ್ರಮವೇನು?
ಉತ್ತರ: ದಿನಾಂಕ 07.04.2025ರ ನಂತರ ಇಂತಹ ಸ್ವತ್ತುಗಳನ್ನು ತೆರಿಗೆ ವ್ಯಾಪ್ತಿಗೆ ತರಲು ಅವಕಾಶವಿಲ್ಲ. ಪ್ರಕರಣ 64ರ ಪ್ರಕಾರ ಅನಧಿಕೃತ ನಿರ್ಮಾಣ ನಿಯಂತ್ರಿಸಬೇಕು.
ಪ್ರ 21. ಸಂತೆ ಅಥವಾ ಮಾರುಕಟ್ಟೆ ಶುಲ್ಕವನ್ನು ಎಷ್ಟು ದಿನಗಳಿಗೊಮ್ಮೆ ವಿಧಿಸಬೇಕು?
ಉತ್ತರ: ಸಂತೆ ನಡೆಯುವ ದಿನಗಳಿಗೆ ಮಾತ್ರ ವಿಧಿಸಬೇಕು. ಹರಾಜು ಪಡೆದವರು ವಿಧಿಸಬೇಕಾದ ದರಗಳನ್ನು ಪಂಚಾಯತಿ ಶರತ್ತುಗಳಲ್ಲಿ ವಿಧಿಸಬಹುದು.
ಪ್ರ 22. ಒಪ್ಪಿಗೆ ಪತ್ರದ (Consent Letter) ಆಧಾರದ ಮೇಲೆ ನಮೂನೆ ವಿತರಿಸಬಹುದೇ?
ಉತ್ತರ: ಇಲ್ಲ. ನಿಯಮಗಳಲ್ಲಿ ಇದಕ್ಕೆ ಅವಕಾಶ ಇರುವುದಿಲ್ಲ.
ಪ್ರ 23. 07.04.2025ರ ಪೂರ್ವದ ಕೈಬರಹದ ರಶೀದಿ ಇದ್ದು PID ಇಲ್ಲದಿದ್ದರೆ ಹೊಸ PID ರಚಿಸಬಹುದೇ?
ಉತ್ತರ: ಹೌದು, ನಿಯಮ 8ರ ಮಾರ್ಗಸೂಚಿಗಳಂತೆ ಬಿಟ್ಟು ಹೋದ ಆಸ್ತಿಗಳನ್ನು ತೆರಿಗೆಗೆ ಒಳಪಡಿಸಲು ಕ್ರಮ ವಹಿಸಬೇಕು.
ಪ್ರ 24. ರೆಸಾರ್ಟ್ ಹಾಗೂ ಹೋಮ್ ಸ್ಟೇಗಳಿಗೆ ಒಂದೇ ರೀತಿ ತೆರಿಗೆ ಇರುತ್ತದೆಯೇ?
ಉತ್ತರ: ಇಲ್ಲ. ನಿಯಮ 9ರ ಪ್ರಕಾರ ಇವುಗಳಿಗೆ ಪ್ರತ್ಯೇಕವಾಗಿ ತೆರಿಗೆ ಲೆಕ್ಕಾಚಾರ ಮಾಡಬೇಕು.
ಪ್ರ 25. RTC ಕಾಲಂ 9ರಲ್ಲಿ ಜಂಟಿ ಮಾಲೀಕರಿದ್ದರೆ ನಮೂನೆ ವಿತರಿಸುವ ಕ್ರಮ ಏನು?
ಉತ್ತರ: RTCಯಲ್ಲಿರುವ ಎಲ್ಲ ಜಂಟಿ ಮಾಲೀಕರ ಹೆಸರಿನಲ್ಲಿಯೇ ನಮೂನೆಗಳನ್ನು ವಿತರಿಸಬೇಕು.
⚖️ ವಿಭಾಗ 7: ಪುನರ್ ವಸತಿ ಮತ್ತು ವಿಶೇಷ ಪ್ರಕರಣಗಳು
ಪ್ರ 26. ಪುನರ್ ವಸತಿ ಕೇಂದ್ರಗಳಲ್ಲಿ ಕೆ.ಜಿ.ಪಿ. ಆಗದ ಕಾಲೋನಿಗಳ ತಕರಾರುಗಳಿದ್ದರೆ ಏನು ಮಾಡಬೇಕು?
ಉತ್ತರ: ತಕರಾರುಗಳನ್ನು ಸಕ್ಷಮ ನ್ಯಾಯಾಲಯದ ಮೂಲಕವೇ ಇತ್ಯರ್ಥಪಡಿಸಿಕೊಳ್ಳಬೇಕು.
ಪ್ರ 27. ಜಲಾನಯನ ಪ್ರದೇಶ ಅಥವಾ ಬಫರ್ ಜೋನ್ನಲ್ಲಿ ನಮೂನೆ 11ಬಿ ವಿತರಿಸಬಹುದೇ?
ಉತ್ತರ: ಇಲ್ಲ. ನಿಯಮ 7(3)ರ ಪ್ರಕಾರ ಪರಿಸರ ಇಲಾಖೆ ಅಧಿಸೂಚಿಸಿರುವ ಪ್ರದೇಶಗಳಲ್ಲಿ ನಮೂನೆ ವಿತರಿಸಲು ಅವಕಾಶವಿಲ್ಲ.
📅 ವಿಭಾಗ 8: ಕಾಯ್ದೆ ಜಾರಿ ಮತ್ತು ಪೂರ್ವ ಪ್ರಕರಣಗಳು
ಪ್ರ 28. ತಿದ್ದುಪಡಿ ಅಧಿನಿಯಮ 2025 ಯಾವಾಗ ಜಾರಿಗೆ ಬಂದಿತು?
ಉತ್ತರ: ದಿನಾಂಕ 07.04.2025 ರಂದು.
ಪ್ರ 29. 07.04.2025ರ ಪೂರ್ವದ ಅಪಾರ್ಟ್ಮೆಂಟ್ಗಳಿಗೆ ನಮೂನೆ ವಿತರಿಸಬಹುದೇ?
ಉತ್ತರ: ಹೌದು, ನಿಯಮಗಳ ಅನುಬಂಧ-2ರಲ್ಲಿನ ದಾಖಲೆಗಳ ಆಧಾರದ ಮೇಲೆ ವಿತರಿಸಬಹುದು.
ಪ್ರ 30. 14.06.2013ರ ಪೂರ್ವದ ಪಂಚಾಯತಿ ಅನುಮತಿ ಪತ್ರ ಹೊಂದಿರುವ ಆಸ್ತಿಗೆ ನಮೂನೆ 11ಎ ನೀಡಬಹುದೇ?
ಉತ್ತರ: ಹೌದು, ನಿಯಮ 5(ಇ) ಪ್ರಕಾರ ಭೂ ಪರಿವರ್ತನೆಯಾಗಿ ಕಟ್ಟಡ ನಕ್ಷೆ ಅನುಮೋದನೆ ಇದ್ದಲ್ಲಿ ಮಾತ್ರ 11ಎ ನೀಡಬಹುದು.
ಪ್ರ 31. ತೆರಿಗೆ ವಿನಾಯಿತಿ ನೀಡುವ ಅಧಿಕಾರ ಯಾರಿಗಿದೆ?
ಉತ್ತರ: ಜಿಲ್ಲಾ ಪಂಚಾಯತಿಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ಅವರಿಗೆ.
No comments:
Post a Comment