ಸರ್ಕಾರಿ ನೌಕರರಿಗೆ ಸಿಹಿ ಸುದ್ದಿ: ಹಬ್ಬದ ಮುಂಗಡ ಮತ್ತು ಗಳಿಕೆ ರಜೆ ನಗಧೀಕರಣ ಇನ್ನು ಆನ್‌ಲೈನ್‌ನಲ್ಲಿ!

ಬೆಂಗಳೂರು: ರಾಜ್ಯದ ಸರ್ಕಾರಿ ನೌಕರರ ಹಿತದೃಷ್ಟಿಯಿಂದ ಹಾಗೂ ಆಡಳಿತದಲ್ಲಿ ಪಾರದರ್ಶಕತೆ ತರುವ ನಿಟ್ಟಿನಲ್ಲಿ ಆರ್ಥಿಕ ಇಲಾಖೆಯು ಮಹತ್ವದ ಹೆಜ್ಜೆಯನ್ನಿಟ್ಟಿದೆ. ಹೆಚ್.ಆರ್.ಎಂ.ಎಸ್-2 (HRMS-2) ತಂತ್ರಾಂಶದಲ್ಲಿ ವೇತನ ಪಡೆಯುತ್ತಿರುವ ನೌಕರರು ಇನ್ನು ಮುಂದೆ ಹಬ್ಬದ ಮುಂಗಡ (Festival Advance) ಮತ್ತು

ಗಳಿಕೆ ರಜೆಯ ನಗಧೀಕರಣಕ್ಕಾಗಿ (EL Encashment) ಕಚೇರಿಯಲ್ಲಿ ಅಲೆದಾಡುವ ಅಗತ್ಯವಿಲ್ಲ. ಇನ್ನು ಮುಂದೆ ESS (Employee Self Service) ಅಪ್ಲಿಕೇಶನ್ ಅಥವಾ ವೆಬ್ ಪೋರ್ಟಲ್ ಮೂಲಕವೇ ನೇರವಾಗಿ ಅರ್ಜಿ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ.

ಏನಿದು ಹೊಸ ವ್ಯವಸ್ಥೆ? ರಾಜ್ಯ ಸರ್ಕಾರದ ಹೆಚ್.ಆರ್.ಎಂ.ಎಸ್-2 ತಂತ್ರಾಂಶವನ್ನು ಬಳಸುತ್ತಿರುವ ಎಲ್ಲಾ ಇಲಾಖೆಯ ನೌಕರರು ಮತ್ತು ಅಧಿಕಾರಿಗಳು ತಮ್ಮ ವೈಯಕ್ತಿಕ ಲಾಗಿನ್ ಬಳಸಿ ಈ ಕೆಳಗಿನ ಸೇವೆಗಳನ್ನು ಪಡೆಯಬಹುದು:

• ಆನ್‌ಲೈನ್ ಅರ್ಜಿ: ಹಬ್ಬದ ಮುಂಗಡ ಮತ್ತು ಗಳಿಕೆ ರಜೆ ನಗಧೀಕರಣಕ್ಕಾಗಿ ESS ಪೋರ್ಟಲ್ ಅಥವಾ ಆಂಡ್ರಾಯ್ಡ್ ಆಪ್ ಮೂಲಕವೇ ಅರ್ಜಿ ಸಲ್ಲಿಸುವುದು ಕಡ್ಡಾಯವಾಗಿದೆ

• ಲಭ್ಯವಿರುವ ಮಾಹಿತಿ: ನೌಕರರು ತಮ್ಮ ವೇತನ ಪಟ್ಟಿ (Salary Slip), ಗಳಿಕೆ ರಜೆ ಮತ್ತು ಅರ್ಧ ವೇತನ ರಜೆಯ ವಿವರಗಳು, ಮುಂಬರುವ ಸಾರ್ವಜನಿಕ ರಜೆಗಳ ಪಟ್ಟಿ, ಮತ್ತು ಸಕ್ರಿಯ ಸಾಲ ಹಾಗೂ ಮುಂಗಡಗಳ ವಿವರಗಳನ್ನು ಇಲ್ಲಿ ವೀಕ್ಷಿಸಬಹುದು.

• ವಿಮೆ ವಿವರ: ಕೆ.ಜಿ.ಐ.ಡಿ (KGID) ವಿಮೆಯ ಪಾಲಿಸಿ ಮಾಹಿತಿ ಮತ್ತು ಪ್ರೀಮಿಯಂ ಮೊತ್ತದ ವಿವರಗಳೂ ಇಲ್ಲಿ ಲಭ್ಯವಿವೆ.

• ಅರ್ಜಿ ಸಲ್ಲಿಸುವುದು ಹೇಗೆ? 

ನೌಕರರು https://hrms2.karnataka.gov.in/essweb/signin ವೆಬ್‌ಸೈಟ್‌ಗೆ ಭೇಟಿ ನೀಡುವ ಮೂಲಕ ಅಥವಾ gov.ka.ess_app ಹೆಸರಿನ ಆಂಡ್ರಾಯ್ಡ್ ಅಪ್ಲಿಕೇಶನ್ ಡೌನ್‌ಲೋಡ್ ಮಾಡಿಕೊಳ್ಳುವ ಮೂಲಕ ಈ ಸೌಲಭ್ಯ ಪಡೆಯಬಹುದು. ಅರ್ಜಿ ಸಲ್ಲಿಸುವ ಹಂತ ಹಂತದ ವಿಧಾನದ ಬಗ್ಗೆ ನೌಕರರ ಸಹಾಯಕ್ಕಾಗಿ 'Help and Tutorials' ವಿಭಾಗದಲ್ಲಿ ಕೈಪಿಡಿಯನ್ನು (Manual) ಕೂಡ ನೀಡಲಾಗಿದೆ.

ಮುಂದಿನ ಬದಲಾವಣೆಗಳು: ಬರುವ ದಿನಗಳಲ್ಲಿ ನೌಕರರ ಎಲ್ಲಾ ರೀತಿಯ ರಜೆ ಕೋರಿಕೆಗಳು, ದೂರು ಪರಿಹಾರ ಪ್ರಕ್ರಿಯೆಗಳು (Complaint Redressal) ಮತ್ತು ಇತರೆ ಕ್ಲೈಮ್‌ಗಳನ್ನು ಸಹ ESS ಮೂಲಕವೇ ನಿರ್ವಹಿಸಲಾಗುವುದು ಎಂದು ಸರ್ಕಾರ ತಿಳಿಸಿದೆ.

ಸದ್ಯಕ್ಕೆ ಈ ವ್ಯವಸ್ಥೆಯ ಬಗ್ಗೆ ಎಲ್ಲಾ ನೌಕರರಿಗೆ ಅರಿವು ಮೂಡಿಸುವಂತೆ ಮತ್ತು ಡಿ.ಡಿ.ಒ (DDO) ಗಳಿಗೆ ಸೂಕ್ತ ಮಾರ್ಗಸೂಚಿ ನೀಡುವಂತೆ ಎಲ್ಲಾ ಇಲಾಖಾ ಮುಖ್ಯಸ್ಥರಿಗೆ ಸೂಚನೆ ನೀಡಲಾಗಿದೆ.

ಗಮನಿಸಿ: ಈ ಹೊಸ ವ್ಯವಸ್ಥೆಯು ಈಗಾಗಲೇ ಹೆಚ್.ಆರ್.ಎಂ.ಎಸ್-2 ಮೂಲಕ ವೇತನ ಪಡೆಯುತ್ತಿರುವ ನೌಕರರಿಗೆ ಮಾತ್ರ ಅನ್ವಯಿಸುತ್ತದೆ.