ಮಸ್ಕಿ: ಸರ್ಕಾರಿ ಕಚೇರಿಗಳ ಘನತೆ ಕಾಪಾಡುವ ನಿಟ್ಟಿನಲ್ಲಿ ಮಸ್ಕಿ ತಾಲ್ಲೂಕು ಪಂಚಾಯತ್ ಮಹತ್ವದ ಆದೇಶ ಹೊರಡಿಸಿದೆ. ಇನ್ಮುಂದೆ ತಾಲ್ಲೂಕು ಪಂಚಾಯತ್ ವ್ಯಾಪ್ತಿಯ ಎಲ್ಲಾ ಅಧಿಕಾರಿಗಳು ಮತ್ತು ನೌಕರರು ಕಚೇರಿ ಸಮಯದಲ್ಲಿ ಕಡ್ಡಾಯವಾಗಿ ಸಭ್ಯ ಉಡುಗೆ (Dress Code) ಧರಿಸಬೇಕು ಹಾಗೂ ಚಲನವಲನ ಮತ್ತು ನಗದು ಘೋಷಣೆ ವಹಿಗಳನ್ನು ನಿರ್ವಹಿಸಬೇಕು ಎಂದು ಸೂಚಿಸಲಾಗಿದೆ.
ಸಭ್ಯ ಉಡುಗೆಗೆ ಆದೇಶ (ಡ್ರೆಸ್ಸಿಂಗ್ ಕೋಡ್):
ಸರ್ಕಾರದ ಘನತೆಗೆ ಧಕ್ಕೆ ಬಾರದಂತೆ ವೃತ್ತಿಪರ ಉಡುಪುಗಳನ್ನು ಧರಿಸುವುದು ಕಡ್ಡಾಯಗೊಳಿಸಲಾಗಿದ್ದು, ಈ ಕೆಳಗಿನ ನಿಯಮಗಳನ್ನು ರೂಪಿಸಲಾಗಿದೆ:
ಸಾಂಧರ್ಭಿಕ ಚಿತ್ರ
- ಪುರುಷರು: ಪ್ಯಾಂಟ್ ಮತ್ತು ಷರ್ಟ್ (Formal Dress) ಮಾತ್ರ ಧರಿಸಬೇಕು.
- ಮಹಿಳೆಯರು: ಸೀರೆ ಅಥವಾ ಚೂಡಿದಾರ ಧರಿಸಲು ಸೂಚಿಸಲಾಗಿದೆ.
- ಗ್ರೂಪ್-ಡಿ ಮತ್ತು ಚಾಲಕರು: ಇವರಿಗೆ ನಿಗದಿಪಡಿಸಿದ ಸಮವಸ್ತ್ರವನ್ನೇ ಧರಿಸಬೇಕು.
- ನಿರ್ಬಂಧ: ಕಚೇರಿ ಸಮಯದಲ್ಲಿ ಜೀನ್ಸ್, ಟಿ-ಷರ್ಟ್, ಕ್ರೀಡಾ ಉಡುಪುಗಳು ಅಥವಾ ಯಾವುದೇ ಅನೌಪಚಾರಿಕ ಉಡುಪುಗಳನ್ನು ಧರಿಸುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.
- ಗುರುತಿನ ಚೀಟಿ: ಪ್ರತಿಯೊಬ್ಬ ನೌಕರರು ಕಡ್ಡಾಯವಾಗಿ ಕಚೇರಿ ಗುರುತಿನ ಚೀಟಿಯನ್ನು (ID Card) ಧರಿಸಿರಬೇಕು.
ಕಚೇರಿ ಶಿಸ್ತು ಮತ್ತು ವಹಿ ನಿರ್ವಹಣೆ:
ಸಾರ್ವಜನಿಕರಿಂದ ಸ್ವೀಕೃತವಾದ ದೂರುಗಳ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದ್ದು, ಪಾರದರ್ಶಕತೆ ಕಾಪಾಡಲು ಎರಡು ಪ್ರಮುಖ ವಹಿಗಳ ನಿರ್ವಹಣೆಗೆ ಸೂಚಿಸಲಾಗಿದೆ:
- ಚಲನವಲನ ವಹಿ (Movement Register): ಅಧಿಕಾರಿಗಳು ಅಥವಾ ಸಿಬ್ಬಂದಿ ಕಚೇರಿ ವೇಳೆಯಲ್ಲಿ ಅಧಿಕೃತ ಕೆಲಸಕ್ಕೆ ಹೊರಗೆ ಹೋಗಬೇಕಾದಲ್ಲಿ ಹೊರಹೋಗುವ ಕಾರಣ, ಸಮಯ ಮತ್ತು ಮೇಲಾಧಿಕಾರಿಗಳ ಅನುಮತಿಯನ್ನು ವಹಿಯಲ್ಲಿ ದಾಖಲಿಸಬೇಕು. ದಾಖಲಿಸದೆ ಗೈರಾದಲ್ಲಿ ಅದನ್ನು 'ಅನಧಿಕೃತ ಗೈರು' ಎಂದು ಪರಿಗಣಿಸಲಾಗುವುದು.
- ನಗದು ಘೋಷಣೆ ವಹಿ (Cash Declaration Register): ನೌಕರರು ಕಚೇರಿಗೆ ಬಂದ ತಕ್ಷಣ ತಮ್ಮ ಬಳಿ ಇರುವ ನಗದು ಮೊತ್ತವನ್ನು ನಿಗದಿತ ವಹಿಯಲ್ಲಿ ನಮೂದಿಸಿ ಸಹಿ ಮಾಡುವುದು ಕಡ್ಡಾಯ.
ಶಿಸ್ತು ಕ್ರಮದ ಎಚ್ಚರಿಕೆ:
ಈ ಆದೇಶಗಳನ್ನು ಉಲ್ಲಂಘಿಸುವ ಅಧಿಕಾರಿ ಅಥವಾ ನೌಕರರ ವಿರುದ್ಧ ಕಟ್ಟುನಿಟ್ಟಿನ ಶಿಸ್ತುಕ್ರಮ ಜರುಗಿಸಲಾಗುವುದು ಎಂದು ಮಸ್ಕಿ ತಾಲ್ಲೂಕು ಪಂಚಾಯತ್ ಕಾರ್ಯನಿರ್ವಾಹಕ ಅಧಿಕಾರಿಗಳು ಎಚ್ಚರಿಸಿದ್ದಾರೆ.
ಈ ಆದೇಶವು ತಾಲ್ಲೂಕು ಪಂಚಾಯತ್ನ ಎಲ್ಲಾ ವಿಭಾಗಗಳು, ಗ್ರಾಮ ಪಂಚಾಯತಿ ಅಭಿವೃದ್ಧಿ ಅಧಿಕಾರಿಗಳು ಮತ್ತು ಕಚೇರಿ ಸಿಬ್ಬಂದಿಗೆ ಅನ್ವಯವಾಗಲಿದೆ.
No comments:
Post a Comment